Vinte e cinco axencias francesas especializadas en congresos, reunións e viaxes de incentivo coñeceron na localidade o oficio das redeiras a través dun obradoiro práctico de nós.
A Praza de Abastos da Pobra do Caramiñal transformouse este venres nun escaparate de excepción para a proxección exterior do patrimonio costeiro galego. Unha delegación de 25 axencias de viaxes procedentes de Francia, especializadas no segmento MICE (congresos, reunións e viaxes de incentivo), recalou no municipio para descubrir de primeira man os seus recursos singulares e a súa arraigada tradición mariñeira.
A visita enmárcase na Xornada Inversa do Spain Convention Bureau dirixida ao mercado francés, promovida en colaboración co Santiago Convention Bureau e a Federación Española de Municipios e Provincias (FEMP). Á súa chegada, os axentes foron recibidos pola concelleira de Dinamización Económica, Amparo Cerecedo; a concelleira de Turismo, Estefanía Ramos; e a técnica municipal da área, Ángeles Tubío Ferreirós.
O fito central da estadía tivo lugar no mercado municipal, onde as redeiras locais —distinguidas coa Carta de Artesanía de Galicia— compartiron os segredos dun labor vencellado de xeito indisoluble á pesca artesanal. Ademais de coñecer a técnica e o valor inmaterial deste oficio, os profesionais galos participaron activamente nun obradoiro práctico centrado na confección de nós e redes. A experiencia completouse cunha degustación gastronómica baseada no produto de proximidade.
Aposta polo emprendemento e a desestacionalización
A cita serviu tamén para amosar o pulo do tecido emprendedor da vila. A loxística contou coa participación directa da empresa de Lucía Outeiral Pérez, con sede no Coworking da Pobra do Caramiñal, evidenciando o potencial destas instalacións municipais para dinamizar iniciativas de alcance internacional.
Esta actividade forma parte dun itinerario máis amplo que se estende do 24 ao 26 de setembro e que abrangue percorridos pola ría de Arousa. Dende o Concello salientan que o turismo de incentivos representa unha vía estratéxica para desestacionalizar a demanda fóra dos meses centrais de verán, integrando colectivos profesionais e espazos tradicionais.
Aínda que nesta ocasión non se incluíu a visita ás mariscadoras —outra das ofertas experienciais consolidadas do municipio sobre o aproveitamento sostible da ría—, a xornada serviu para posicionar A Pobra como un destino idóneo para eventos corporativos diferenciados que combinan sustentabilidade, autenticidade e tradición.
