• O xogador brasileiro procede do Ao-Khaleej Saihat árabe, club no que militou as tres últimas tempadas
• O punta de 32 anos regresa a Europa para afrontar a súa primeira experiencia na Superliga española
Boiro, 17 de agosto de 2022. Kleist Praia Mendonça, receptor brasileiro de 32 anos e 1,93 metros de estatura, xogará no Rotogal Boiro Voleibol a tempada 2022-2023. Internacional co seu país en categoría xuvenil, afronta a súa primeira experiencia en España procedente do Ao-Khaleej Saihat árabe,
club no que militou as tres últimas tempadas.
Kleist Mendonça xa coñece o voleibol europeo. Na tempada 2015-2016, proclamouse campión da liga de Romanía co Universitatea Craiova. Antes, conseguira os subcampeonatos da competición grega co Pamvochaikos e da suíza co Pallavollo Lugano, equipo co que gañou a Supercopa helvética.
Kleist Mendonça convértese no duodécimo xogador do persoal do Rotogal Boiro Voleibol despois de que o club confirmase a presenza no primeiro equipo dos colocadores Jaime Arjones e Ismael Martínez; os opostos Gerónimo Elgueta e Juan Quelle; os receptores Alan Davila e Martín Casais; os centrais Wu Cheng-Tang, Héctor Barro e Mario Iglesias; e os líberos Adrián Alves e Alberto Tubío.
