A comarca do Barbanza deitouse este xoves 4 de agosto coa máxima preocupación, provocada polo primeiro gran incendio da tempada na nosa contorna, un lume orixinado na parroquia de Cures que ao mediodía venres 5 de agosto xa levaba arrasadas unhas 350 hectáreas de monte arborado e baixo, avivado fortemente polo vento do nordés e ameazando dende a xornada previa ás aldeas de Montaña, Montañó, Piñeiro ou Mosquete, entre outros núcleos de poboación. Neste intre, ao mediodía deste venres, aínda permanecía activo, segundo informacións actualizadas da Consellería de Medio Rural.
As lapas, cunha fronte de máis de máis de cinco quilómetros que avanzou sen control durante a noite (houbo que interromper co solpor os labores de extinción dende o aire), provocaron unha nube de fume que se estendeu até Ribeira, e máis alá cubrindo a práctica totalidade da Serra de Barbanza e as súas estribacións e provocando a alarma entre a cidadanía e confusión sobre onde se atopaba a orixe do lume (chegouse a crer que estaba ás portas de Ribeira).
Este xoves a última hora estaban traballando no lugar os bombeiros e os efectivos de emerxencias de Boiro, o GAEM de Ribeira e equipos da Consellería de Medio Rural. Máis polo miúdo, contouse co seguinte despregue de recursos humanos e materiais: dous técnicos, 1 8axentes forestais, trinta e dúas brigadas, 23 motobombas, catro pas, sete avións e sete helicópteros. Coa chegada da noite o lume seguiu avanzando cara As Chans do Barbanza.
