Dodro vai acoller este sábado 13 de agosto a presentación dun libro que repasa a vida e o legado dun dos veciños máis destacados do concello: Moncho Reboiras. Estamos a falar do libro Reboiras. O camiño da rebeldía (Aira Editorial), que se dá a coñecer este sábado ás 20.00 horas, na Eira da Lavandeira (Imo) nun acto que contará coa presenza dos seus autores, Xurxo Martínez e Xosé Manuel Pereiro.
Presentación editorial
Xosé Ramón Reboiras Noia é moito máis ca Moncho Reboiras, unha imaxe nun cartaz ou nun valado. Unha persoa por riba dun mito. Un dos grandes dirixentes políticos do nacionalismo a quen o franquismo lle arrebatou a mocidade, o entusiasmo e a rebeldía en agosto do 1975.
Neste libro, histórico e xornalístico, Xosé Manuel Pereiro e Xurxo Martínez González, danlles voz aos compañeiros e compañeiras daqueles anos de fulgor e atrevemento, levándonos a un tempo moi distinto do actual onde todo estaba por construír.
