O Concello de Boiro reivindica a súa historia (e a súa memoria) cun roteiro polo Camiño Real

O Concello de Boiro, a través da área de Memoria Histórica, vai desenvolver unha actividade denominada Roteiro da memoria polo Camiño Real, co obxectivo de recuperar a historia esquecida do concello (silenciada por aqueles que impuxeron a súa versión ao longo de diferentes épocas e acontecementos) ao tempo que se pon en valor o rico patrimonio local. A concelleira de Memoria Histórica, Dores Torrado, fixo na mañá deste mércores 10 de agosto a presentación da ruta que se comezará a realizar no mes de setembro.

Segundo dixo, o obxectivo concreto desta actividade é enxalzar o valor da ruta do Camiño Real e recuperar a memoria histórica, patrimonial, cultural e social dun lugar emblemático do municipio. “O Camiño Real foi a primeira das vías de comunicación que tivo Boiro e recolle moitos elementos patrimoniais e da memoria colectiva”, recoñeceu a concelleira Dores Torrado.

Tamén lembrou que “a zona de Cimadevila foi centro administrativo, comercial e social de Boiro durante moitos anos, polo que a ruta que vaise realizar ten elementos significativos da nosa memoria colectiva”.

O percorrido transcorre dende Cimadevila e pasa polo Camiño Real e vai ata Ponte Goiáns. En concreto vaise actuar en lugares significativos da historia do municipio como son a praza do Cuartel Vello, a entrada ao Camiño Real, a praza da Igrexa de Boiro, a Casa da Tenencia e a fonte de Ponte Goiáns co obxectivo de dar a coñecer a memoria colectiva do noso pobo por medio de traballos realizados polo Concello de Boiro.