O comercio de Boiro pon este mes de agosto o broche de ouro ás rebaixas locais

O comercio de Boiro vai poñer o punto e final ás rebaixas locais cunha destacada iniciativa de promocións e ofertas. Farao a través da campaña Stocks Fóra Boiro, impulsada dende Asociación Boirense de Empresarios, que se desenvolve os días 18, 19 e 20 de agosto. Durante este tempo, os establecementos ofrecerán centos de produtos e servizos a prezos de liquidación.

Os comercios participantes, durante estas datas, terán sinalizados os escaparates e os produtos que se porán a venta a prezos de liquidación con carteis circulares vermellos elaborados especificamente ao abeiro desta iniciativa, co obxectivo de que axudar ao cliente a identificar claramente os produtos e participantes.

“Con esta campaña”, informa ABE, “porase o punto e final ás rebaixas de verán e os clientes poderán adquirir produtos a prezos súper rebaixados no remate final da campaña ademais de poder ver xa nas tendas o adianto da campaña de outono”.