O BNG de Ribeira achega alternativas ante as restricións para que a veciñanza acceda aos seus garaxes durante Artemar

O BNG propuxo unha batería de alternativas ante as restricións de máis de 10h para que os veciños accedan aos seus garaxes. Fíxoo ante as queixas das persoas residentes nas rúas do centro urbano ribeirense como Lustres Rivas, Alcalá Galiano, Campo de Marte, rúa de Lugo ou Rosalía de Castro, que segundo reflicte a agrupación nacionalista, “mostraron o seu malestar ante as limitacións de acceso que impón o Goberno local para celebrar a Feira Artemar”.

Os concelleiros do BNG Cruz Rivadulla e Luís Pérez Barral

O portavoz do BNG, Luís Pérez Barral, atendeu algunhas veciñas e veciños as queixas e demanda que o Goberno ribeirense adopte algunha solución e “busque alternativas que non pasen por prohibirlle á xente entrar no seu garaxe durante dez horas ao día”. Barral argumenta que “calquera persoa entende que a celebración de feiras e eventos pode ocasionar algúns pequenos trastornos, mais non se entenden unhas restricións tan excesivas durante catro días e nun horario tan amplo xa que as restricións establécense de 11:00h a 15:00h e de 18:00h até a media noite”.

A formación nacionalista cre “que estas prohibicións son consecuencia da falta de planificación que existe nos eventos que se realizan na vila”. E engaden: “Onde vai deixar o seu coche a xente? É unha xestión nefasta porque están ocasionando molestias inncesarias e provocan un caos no tráfico cando non hai necesidade”.

Barral sostén que “en troques de amorear todo nas rúas do centro e bloquear os garaxes, a feira podería estenderse a barrios historicamente discriminados como Bandourrío ou a contorna do Parque García Bayón”. E engade: “Parece que hai barrios que non son de Ribeira porque nunca acollen eventos e todo se fai no centro, no BNG apostamos por dinamizalos xerando dinamismo económico e social”. Por último, reclaman que cando se teñan que realizar restricións tan longas no tempo, se habiliten alternativas gratuítas.