Noia e Rianxo van acoller neste treito final de verán dúas actividades de divulgación para descubrir os tesouros da bóveda celeste á cidadanía.
A cita de Noia será o 30 de agosto no Paso Marítimo, a carón das pistas de tenis.
A cita de Rianxo será vindeiro xoves 01 de setembro, ás 21.00 h, no Centro Sociocultural Auditorio.
En ámbolos dous casos trátase da observación astronómica A Vía Láctea e outros motivos xacobeos do Camiño, abeirada ao programa Astronomía 2022, O Teu Xacobeo, organizado por Observatorio Astronómico Ramón María Aller, da USC (Universidade de Santiago) e o Concello de Rianxo, co apoio do Xacobeo 21-22.
A actividade divulgativa A Vía Láctea e outros motivos xacobeos do Camiño forma parte dunha xira galega para dar a coñecer a riqueza patrimonial do Camiño de Santiago e os fenómenos e obxectos astronómicos asociados ao itinerario. Rianxo e Noia foron elixidas para formar parte das actividades divulgación do Observatorio Astronómico Ramón María Aller (OARMA) da USC . Coordinado polo director do Observatorio, José Ángel Docobo, o programa combina sesións de astronomía, da súa man e da de integrantes do persoal investigador e colaborador do OARMA, como Pedro Pablo Campo, Xabier P. Couto, María Brea e Jorge G. Crespo, con conferencias en relación coa arte xacobea do Camiño, que serán impartidas por Cecilia Doporto, experta neste ámbito.
Nas diferentes paradas da xira as persoas participantes aprenderán a identificar diferentes obxectos observábeis como as constelacións, coa contemplación do chamado triángulo de verán que conforman as estrelas brillantes Vega (na constelación da Lira), Altair (na Aguia), e Deneb (no Cisne), así como a propia Vía Láctea, visíbel cando os ceos están ben escuros, ou os planetas Xúpiter e Saturno, que poderemos observar á primeira hora da noite estes últimos días de agosto. Os telescopios desprazados pola USC permiten ademais divisar estrelas dobres, nebulosas e cúmulos estelares e, sobre todo, os detalles da Lúa en canto esta entre na súa fase crecente.
Todas as sesións son de balde e na páxina web do programa pódense consultar as datas previstas en cada concello así como as vías para reservar as prazas dispoñíbeis.
