Este domingo 28 de agosto será unha data sinalada para as corredoras e corredores da nosa comarca e doutras terras próximas e non tan próximas, aos que non lles quedará outra que poñer o punto de mira na Pobra do Caramiñal. De feito está prevista para ese día a décimo terceira edición da Carreira Popular Concello da Pobra do Caramiñal, pertencente ao V Circuíto de Carreiras Populares Barbanza Arousa 4 carreiras, 1 meta e ao VIII Circuíto Provincial de Carreiras Populares da Deputación da Coruña.
O obxectivo é promover a actividade física nos distintos rangos de idade ao tempo que se practica deporte ao aire libre, nesta ocasión “polo núcleo urbano co mar como acompañante durante todo o traxecto”.
No que respecta á participación, agardan que esta convocatoria iguale ou incluso supere a cifra de anteriores anos.
O evento poderán asistir tanto atletas federados/as en atletismo coma non federados/as e abrangue as categorías dende a sub-6 ata a máster 4, ademais de dispor da modalidade Sapatilla Inclusiva. Estarán baixo o control técnico do Comité de Xuíces da Federación Galega de Atletismo.
As saídas efectuaranse dende a rúa Fernández Albor, das 10.45 horas en diante, e a meta situarase no interior da praza Alcalde Segundo Durán, onde se procederá coa entrega de premios a partir das 13.30 horas.
Outorgaranse trofeos ós/ás tres primeiros/as clasificados/as por categoría, premios en metálico e agasallos ós/ás cinco primeiros/as clasificados/as da xeral, camiseta técnica para os/as participantes na proba absoluta e medallas para a sub-6 e sub-8.
Contarase coa colaboración da Protección Civil e cumprirase o protocolo FISICOVID-DXTGALEGO.