A xeografía vital e literaria de Rosalía de Castro é rica e complexa, pero nela ocupa un lugar de
primeira orde o Concello de Dodro. Non é posible falar de Dodro sen falar de Rosalía de Castro
e viceversa, coa autora Dodro aparece na cartografía literaria de Galicia. Mencionouno nalgún
artigo e inmortalizouno nos seus poemas. Rosalía tiña casa en Dodro, en Lestrobe: as Torres
de Hermida do seu curmán José de la Hermida Castro, onde viviu en diferentes épocas da súa
vida, aquí naceron os xemelgos Gala e Ovidio, bautizados en Santa María de Dodro e neste
lugar asinou varias da súas obras, coma “Padrón y las inundaciones”, “El primer loco” ou “En
las orillas del Sar”. A poeta que é todo un emblema de Galicia converteuse ademais na
principal embaixadora cultural deste municipio e da súa poboación.
Por estes motivos e como mostra de recoñecemento a súa excepcional traxectoria literaria e a
súa contribución á cultura galega, así como xesto de afecto e gratitude polo labor prestado ao
coñecemento e promoción de Dodro e do seu patrimonio, o Concello de Dodro ven de propor a
concesión do título honorífica de Filla Adoptiva, á título póstumo, á poeta Rosalía de Castro.
A iniciativa naceu da Concellería de Cultura e Patrimonio, no mes de abril e logo de seguir o
procedemento recollido no Regulamento de honras e distincións do Concello de Dodro (BOP
núm. 120 do 29/06/2021), finalmente será sometida a votación da corporación municipal para a
súa aprobación no vindeiro Pleno, o cal terá lugar o xoves, 11 de agosto, ás 12.00 horas, na
Casa do Concello.
O Concello de Dodro desexa convidar á veciñanza a compartir un acto tan emotivo, no que se
agarda a presencia de Anxo Angueira Viturro, presidente da Fundación Rosalía de Castro.
Lembremos que Rosalía de Castro é de Dodro, de Galicia pero sobre todo é universal, este
nomeamento supón un exercicio de xustiza social polo traballo e contribución da poeta na
defensa da nosa lingua e cultura galega, pero sobre todo un exercicio de democracia cultural
pois a súa escrita constitúe un estímulo para a creación cultural, un referente pedagóxico e un
emblema identitario para as novas xeracións.
