O Concello de Dodro vén de instalar dúas marquesiñas para o estacionamento de bicicletas na Casa do Concello e máis no CPI Eusebio Lorenzo Baleirón, que se completan cos dous aparcadoiros xa existentes no Pavillón Polideportivo Municipal e no Campo de Fútbol de Chelo, “co obxectivo de incentivar a mobilidade sustentábel entre a poboación”, sinalaron fontes do equipo de Goberno. O investimento foi de 9.058,06 € e cun co-financiamento de 4.529,03 € ao abeiro do Programa Estatal de Incentivos á Mobilidade Eficiente e Sustentábel (programa Moves II).
O Concello explicou que Dodro é un lugar idóneo para a práctica da actividade ciclista, onde as aldeas están próximas unhas das outras e os distintos servizos (Casa do Concello, Servizos Sociais, CPI, Escola Infantil, Campo de Fútbol, Pavillón Polideportivo, Centro de Saúde, Centro de Día) atópanse a menos de 10 quilómetros de calquera vivenda. “A orografía tamén fai do noso concello un lugar axeitado para práctica ciclista, onde o 55% da poboación concéntrase nunha cota menor dos 30 metros de altitude e o 90% a menos de 100”, engaden dende o Consistorio.
