A pretemporada do Rotogal Boiro Voleibol comeza o luns

O inicio da pretempada do Rotogal Boiro Voleibol está fixado para este luns no Pavillón da Cachada. O técnico Emilio Palacio dirixirá a primeira sesión do curso e contará, en principio, con todos os seus efectivos a excepción do receptor Kleist Mendonça, o oposto Gerónimo Elguetta e o central Wu Cheng-Tang.

O Rotogal Boiro Voleibol xa concertou varios amigábeis para afinar a posta a punto antes do inicio da Superliga. O primeiro deles celebrarase o sábado 10 de setembro en Lugo e o rival será o Emevé. O sábado 17, os da Cachada mediranse co Vigo en semifinais da Copa Galicia, que se celebra en Pontevedra. Ademais, o sábado 24 tomarán parte nun cuadrangular organizado polo San Sadurniño no que, ademais dos da Cachada e os anfitrións, participarán o Emevé e o Viana portugués.

O Rotogal Boiro Voleibol iniciará a Superliga en outubro contra o Unicaja Almería, vixente campión da competición e verdugo do conxunto galego en cuartos de final da campaña 2021- 2022. O choque celebrarase na Cachada.