M. A. – Unha sesión dobre de adestramento na Cachada supuxo este luns 29 de agosto o punto de partida da pretempada do Rotogal Boiro Voleibol. O equipo que adestra Emilio Palacio exercitouse por primeira vez na campaña 2022-2023 mentres permanece á espera da incorporación do oposto arxentino Gerónimo Elguetta, o receptor brasileiro Kleist Mendonça e o central taiwanés Wu Cheng-Tang. Este martes 30 celebrarase unha nova sesión dupla de preparación no pavillón dos boirenses.
O Rotogal Boiro Voleibol contará con case dúas semanas de preparación antes de afrontar o primeiro
amigábel contra o Emevé, que se celebrará en Lugo o 10 de setembro. O inicio da Superliga será a primeira fin de semana de outubro e o rival será o Unicaja Almería, vixente campión da competición, na Cachada.
Por outra banda, a asemblea ordinaria do Boiro Voleibol celebrarase este venres. A primeira convocatoria está fixada para as 20.30 horas e a segunda, para as 21.00 horas. A orde do día inclúe a lectura e, no seu caso, aprobación da acta da anterior asemblea extraordinaria do club; o estado da subvención extraordinaria do Concello de Boiro; a presentación do orzamento para a tempada 2022-2023; a aprobación da cota de socios para a tempada 2022-2023; e a presentación da normativa para as categorías de base. Posteriormente, antes de clausurar a asemblea, procederase á quenda de rogos e preguntas.
