A Pobra do Caramiñal será unha das sedes da Regata Rías Baixas Xacobeo 2022

O porto da Pobra do Caramiñal será a sede arousá da Regata Rías Baixas Xacobeo que neste 2022 acada a súa 59 edición. Trátase, segundo fixeron saber o alcalde e máis o presidente do Real Club Náutico Vigo, “du evento xa consolidado no turismo náutico que destaca polo seu atractivo: un total de 80 embarcacións de 14 metros de eslora navegarán a vela as Rías Baixas”.

O rexedor Xosé Lois Piñeiro (Nós Pobra), e o presidente do Real Club Náutico de Vigo, José Antonio Portela, presentaron na mañá deste 8 de agosto esta regata na súa etapa pola Pobra. Ambos fixeron fincapé “na dimensión desta cita” que, segundo sinalaron, “contribúe a dinamizar as actividades náuticas, ademais de xerar un movemento na localidade de aproximadamente 1.800 persoas, entre tripulantes dos veleiros e familiares que os acompañan en terra”. Outro dos obxectivos, engadiron, é “enxalzar o valor que ten a ría da Arousa a nivel económico, cultural e paisaxístico”.

Piñeiro e Portela explicaron tamén que travesía arribará no 11 de agosto ao concello, completando así a segunda etapa con saída de Combarro. Na xornada seguinte focalizarase exclusivamente na Pobra, pois será porto de saída e chegada da terceira etapa para, no día 13, dirixirse a Vigo coa cuarta.

Durante estes días farase entrega de premios por cada un dos tramos e ofrecerase un ágape no centro sociocomunitario.

Cómpre indicar que a primeira etapa correspóndese con Vigo-Combarro, mentres que a quinta e última céntrase na cidade olívica.