A plataforma en contra da depuradora de Queiruga entrega 1.852 sinaturas a prol dunha nova localización

A Plataforma en contra da ubicación da depuradora no Río Maior/Praia do Dique compartiu un comunicado no que informa das súas máis recentes actividades destinadas a impedir a localización da dita infraestrutura de saneamento a carón dunha paraxe que consideran de especial protección: a praia do Dique e a súa contorna e toda a franxa costeira e marítima da parroquia de Queiruga, en Porto do Son. Segundo fan saber, este 17 de agosto entregaron as sinaturas de apoio ás súas reclamacións nas oficinas centrais de Augas de Galicia en Santiago de Compostela.

A praia do Dique en Queiruga

No comunicado tamén plasman as súas queixas sobre o trato que din que están a recibir dende o Consistorio: “Dende a plataforma pedimos de diferentes maneiras a comparecencia do alcalde de Porto do Son para dar explicacións sobre esta decisión imposta sen consultar o pobo e a sabendas de que estabamos en contra”. A plataforma considera que o rexedor “nin deu explicacións, nin tomou en consideración as nosas alternativas para solucionar o problema”.

Os veciños de Queiruga (A Ponte de Queiruga) consideran que a construción da depurada, cuxa habilitación “nun lugar tan idílico como a praia do Dique”, non foi a solución máis axeitada. Por este motivo, xuntaron sinaturas reclamando un cambio de localización e apelando á necesidade de protexer “un lugar de altísimo valor paisaxístico e sentimental”, sinalan, engadindo que ao devandito súmase a problemática de instalar unha depuradora a carón das súas vivendas, coa posibilidade de que haxa vertidos ao río. Tamén recordan que o proxecto fora tumbado en 2009 e recuperado polo Goberno actual despois da pandemia “omitindo a información aos veciños da contorna e mentíndonos, evitando por todos os medios reunirse con nós”.

Salientan tamén o feito de conseguir que unha localidade como Queiruga, de 800 habitantes, tivera acadado nun mes a cifra de 1.852 sinaturas.