A praza Castelao de Rianxo vai acoller o vindeiro 17 de xullo (ás 22.30) un concerto de Xabier Díaz & Adufeiras de Salitre presentando o seu novo traballo As Catedrais Silenciadas.
A proposta forma parte da programación de Rede Cultural da Deputación da Coruña. O concerto encádrase no programa de actividades das Festas do Carme de Rianxo, que se celebran entre o 14 e o 17 de xullo, baixo a organización da Comisión das Festas do Carme en colaboración co Concello e a Deputación.
As Catedrais Silenciadas é o terceiro álbum de Xabier Díaz & Adufeiras de Salitre. Chega tras unha extensa xira por máis de 13 países e 200 concertos. O título é un berro de alerta ante o progresivo despoboamento rural e a perda identitaria que isto implica: a desaparición da cultura que temos e que fundamenta a nosa diferenza no mundo.
