O salón de plenos de Ribeira acolleu na súa máis recente sesión unha nutrida representación da veciñanza de Palmeira, que acudiu para asistir ao debate da moción presentada polo BNG local coa que se pretende “garantir a atención sanitaria de calidade” e “demandar da Xunta que cubra todas as baixas e vacantes do persoal médico que hai nos centros de saúde do municipio”.
Os nacionalistas argumentaron que “a situación da atención primaria no concello empeora a pasos axigantados por mor da precariedade laboral que padece o persoal sanitario e debido aos recortes aplicados polo Goberno galego”. O BNG, neste senso, cualificou de “insostíbel” a situación no caso concreto de Palmeira. Alí, sinalou o grupo, “malia que o centro debe atender máis de 1.100 pacientes, non se cobre a baixa do médico a tempo completo e só mandan profesionais médicos despois da súa xornada laboral desde Silleda ou desde Noia para cubrir a baixa do único médico que ten o centro palmeirense”.
O portavoz do BNG, Luís Pérez Barral, tamén detallou o que acontece co Centro de Saúde de Ribeira, cun cupo de máis de 20.000 persoas e onde, sinalou, “a día de hoxe faltan 6 facultativos e facultativas se contamos coas libranzas por facer horas de garda no Punto de Atención Continuada (PAC) porque o SERGAS non cobre as baixas e as vacacións do persoal”.
Desde o BNG mostraron a súa satisfacción porque “a grande mobilización social que está habendo para defender a Sanidade pública, está provocando mudanzas, pois obrigou ao Goberno local e ao rexedor, Manuel Ruiz, a ter que defender os intereses da veciñanza ribeirenses por riba dos intereses do PP, algo que até o de agora nunca demostrou”, sinalou Pérez Barral, que instou ao Executivo ribeirense a “se poñer a carón da veciñanza para esixir solucións que permitan cubrir as baixas, as vacantes do persoal nos centros de saúde e se poña fin á precariedade laboral así como a sobrecarga que o SERGAS obriga aos seus profesionais”.
