Neste ano 2022 retomamos o proxecto anual “O Camiño, a Orixe”, no que de maneira simbólica percorreremos o novo Camiño de Santiago “A Orixe” que transcorre por terras barbanzanas. O obxectivo é poñer en valor e dar a coñecer este camiño entre as nosas persoas usuarias, favorecendo así a súa integración na vida social, cultural e patrimonial da nosa contorna. Paralelamente con este tipo de saídas
pretendemos favorecer actividades de lecer e desfrute entre as persoas usuarias do centro.
Nun primeiro momento, realizamos un traballo previo no que dentro das actividades do centro, tratamos temas de interese de cada Concello, lugares emblemáticos de cada unha das etapas así como a historia do camiño de Santiago – A Orixe.
Posteriormente realizamos a correspondente “saída-peregrinación” a cada unha das etapas, visitando así os diferentes Concellos do Barbanza polo que transcorre o Camiño de Santiago da Orixe: Ribeira, A Pobra do Caramiñal, Boiro, Rianxo, Dodro e Padrón.
Definimos o itinerario da saída e lugares a visitar en función das preferencias das persoas usuarias e adecuándonos á condición física das participantes e das barreiras arquitectónicas presentes en cada un deles. Realizamos a saída nun autobús adaptado a persoas con mobilidade reducida que nos achega aos lugares elixidos para visitar. Realizamos un percorrido polo lugar así como unha breve descrición
deste, que nos permita así coñecelo e facilitar o seu desfrute o tempo que alí permanezamos.
A continuación exponse a distribución das etapas do camiño que se están desenvolvendo ao longo do ano 2022, así como a súa temporalización:
✔ ETAPA 1: Faro de Corrubedo – A Guía, visitando o Concello de Ribeira en abril de
2022.
✔ ETAPA 2: Capela da Guía – Igrexa de Santa María do Caramiñal, visitando o
Concello de A Pobra do Caramiñal en maio e xuño de 2022.
✔ ETAPA 3: A Pobra do Caramiñal – Igrexa de S. Vicenzo de Cespón, visitando o
Concello de Boiro en xullo de 2022.
✔ ETAPA 4: Igrexa de S. Vicenzo de Cespón – Quintáns, visitando o Concello de
Rianxo, en xullo e agosto de 2022.
✔ ETAPA 5: Quintáns- Padrón, visitando o Concello de Dodro, en setembro de 2022 e
o Concello de Padrón en outubro de 2022.
