A Deputación da Coruña rematou no concello de Dodro a primeira fase da limpeza e mantemento da ponte do Portancho, en Traxeito, con vistas a finalizar a segunda fase de limpeza e restauración na primeira semana de setembro. Os traballos comezaron hai unhas semanas cun estudo previo por parte da empresa de arqueoloxía encargada da limpeza e posta en valor da histórica estrutura e cunha roza integral da contorna. Esta iniciativa responde a unha solicitude feita dende o Consistorio e transmitida ao departamento de Vías e Obras da Deputación da Coruña. No requirimento poñíase o foco no estado actual da ponte, cuxa estrutura de arco non era apreciábel debido á vexetación que a recubría.
