O Grupo 127 Galicia, que reivindica unha forma máis tranquila e divertida de viaxar ao tempo que poñen en valor o mítico e histórico modelo da casa SEAT, o 127, vai facer o vindeiro 31 de xullo unha quedada na Pobra do Caramiñal. Segundo nos conta Fran Santiago, membro do dito grupo, a cita será un xeito de conmemorar o 50º aniversario deste modelo. Á xuntanza asistirán participantes de diferentes puntos da nosa Comunidade e incluso Portugal, Asturias, etc.
Durante esta concentración, os clásicos estarán estacionados na praza Alcalde Segundo Durán e dende organización informan que haberá actividades como pequenas probas para que “os condutores demostren as súas habilidades”. Amais, haberá un photocall para toda a xente que queira achegarse, que se levará da xuntanza unha foto der recordo logo de ver e coñecer diferentes unidades e versións deste clásico popular do motor.
Máis datos no Facebook do Grupo 127 Galicia.
A quedada conta coa colaboración do Concello da Pobra do Caramiñal.
