Roi Jorge Vázquez, rider nado en Lousame, foi convocado pola selección española para tomar parte na Copa do Mundo UCI de BTT, que se celebra esta semana en Vallnord-Pal Arinsal (Andorra). O ciclista de categoría júnior competirá nun campionato que contará con ao redor de 800 deportistas procedentes de cincuenta países que participarán en modalidades XCO, XCC e DHI.
Roi Jorge Vázquez acode por segunda vez a unha convocatoria da selección española de BTT despois de realizar o seu debut internacional en marzo, en Lourdes, tras a chamada de Mikel Zabala, seleccionador nacional. A Copa do Mundo arrinca hoxe e o obxectivo do ciclista de Lousame é acumular experiencia e tratar de mellorar os resultados obtidos na súa anterior comparecencia internacional.
Roi Jorge Vázquez preparouse de maneira exhaustiva para tomar parte na Copa do Mundo. Durante o último mes, programou moitas sesións dobres de ximnasio e bicicleta. Hai dúas semanas, participou na Copa de España DHI, celebrada en Panticosa, na que tivo boas sensacións, pero non puido pasar dunha discreta sexta posición, prexudicado por unha leve caída.
