O alumnado inscrito nos dous campamentos municipais de conciliación promovidos polo Concello de Ribeira (Xoga con nós e Camp of Cultural Summer) está a participar dende o mediodía deste luns 18 de xullo na campaña Ti si que es un bo peixe, deseñada pola Consellería do Mar coa finalidade de promocionar o consumo de produtos frescos do mar.
Con tal motivo as rapazas e rapaces asistiron a un obradoiro no que dunha maneira divertida e amena coñeceron as vantaxes de consumir peixes e mariscos e manter unha dieta equilibrada.
Na actividade, celebrada nas instalacións do colexio O Grupo, estivo presente a concelleira de Cultura, María Sampedro, quen destacou a idoneidade desta iniciativa para que os nenos e nenas se familiaricen coas características destes alimentos que poden atopar nos seus fogares e nos mercados municipais.
