Crianzas participantes nos obradoiros Móvete atópanse estes días compartindo experiencias coas persoas maiores usuarias do Centro de Día da Pobra do Caramiñal. Nesta xornada do 28 de xullo asistiron para interpretar un popurrí de cancións tradicionais galegas e outras pertencentes a xéneros contemporáneos.
Outra das actividades exercidas nesta semana foi con motivo do Día dos Avós, no cal os nenos e nenas quixeron felicitalos cunha performance e un poema de Saramago, trasladándolles así o seu agarimo. Deseguido, estiveron conversando sobre os xogos e xoguetes máis populares da nenez dos/as anciáns.
E, xa para os vindeiros días, está previsto que compartan o contacontos A que sabe a Lúa?. A maiores, desenvolverase un espectáculo de maxia e monicreques .
Esta serie de propostas atópanse ao abeiro dos obradoiros de conciliación para a tempada estival postos en marcha pola Concellaría da Igualdade, da cal é titular a edil Charo Varela (Nós Pobra).
