En calquera sociedade democrática moderna que se prece é moi importante dispor duns medios de comunicación libres, veraces e independentes. Por desgraza, desde hai algún tempo, a liberdade de prensa converteuse nunha manipulación frecuente ao servizo de intereses corporativistas, empresariais e políticos. Mesmo pretenden derrocar gobernos, elixidos democraticamente, pola porta de atrás coas súas manipulacións interesadas.
Recordo, con satisfacción, cando os medios de comunicación sabían e querían distinguir ente o que é información e opinión. Buscaban trasladar á sociedade unha información obxectiva sen deixar de reflectir os diferentes puntos de vista e de plasmar a liña editorial dunha maneira ben diferenciada. Actualmente vemos como o bulo, o insulto, a manipulación e a mentira campan ás súas anchas por moitos medios de comunicación que non ocultan defender os seus propios intereses corporativistas e ideolóxicos, aínda que logo son os primeiros en criticar a manipulación dos medios públicos.
Aqueles medios de comunicación que denunciaban a corrupción, o clientelismo e a malversación de fondos públicos xa pasaron á historia. Tamén é certo de que cada vez máis os medios dependen da publicidade institucional e empresarial unha vez que as vendas diminuíron, as subscricións esborralláronse drasticamente así é que necesitan das axudas e subvencións públicas para manter a súa supervivencia. Isto favorece o clientelismo e por tanto a desinformación en favor dos gobernantes de quenda, xa sexan locais, provinciais, autonómicos ou estatais.
Os diferentes medios de comunicación (prensa, radio, tv, internet) teñen que reencontrarse co camiño da seriedade, a profesionalidade e a independencia informativa, pola contra seguirán fomentando o enfrontamento entre as dúas españas e a desconfianza nos medios que deberían ser un alicerce fundamental da sociedade democráticas.
