Comeza xullo e co novo mes collen impulso unha manchea de actividades culturais nos nosos concellos. En Rianxo, este venres 1 (e até mañá, sábado 2 de xullo) terá lugar no Pazo de Rianxiño o Festival de Verán do alumnado da Escola de Música de Rianxo. A primeira xornada a actividade dará comezo ás 20.00 horas e ao día seguinte, sábado, a música comezará a soar a partir das 12 do mediodía. Organizan a Escola de Música e o Concello coa colaboración da Deputación e Xunta.
Por outra banda, a Área de Cultura de Rianxo tamén lembra que este sábado 2 de xullo comezan as actividades da XVII edición do Ciclo de Bandas, organizado igualmente pola Escola de Música de Rianxo en colaboración co Concello e a Deputación. Farao co concerto monográfico adicado ao compositor norteamericano John Williams, un dos grandes autores de bandas sonoras cinematográficas dos séculos XX e XXI. Esta homenaxe a John Williams virá da man da Banda da Escola de Música de Rianxo e celebrarase, a partir das 22.30 horas, no Campo de Arriba (con proxección de imaxes incluída).
Ao día seguinte, domingo 3, intervirá a Banda de Música de Visantoña a partir das 21.00, tamén no Campo de Arriba.
