Boiro acolle este sábado 30 de xullo unha nova edición da proba deportiva Promoción de Ciclismo de Boiro 2022, que este ano está dedicado ao presidente e fundador Ricardo Riveiro. Presentaron o evento, en rolda de prensa, o alcalde, José Ramón Romero, a concelleira de deportes, Dores Torrado, o presidente do Club, Ricardo Riveiro, o presidente da Federación Galega de Ciclismo, Carlos Muñiz, e o directivo do club, José Ramón Torrado.
Segundo fixeron saber, “son máis de 260 as persoas inscritas para esta proba que constará de tres percorridos distintos para as categorías alevín, infantil e cadete”. O primeiro dos percorridos será de 5,5 quilómetros; o segundo de 14 quilómetros e a proba cadete que pasa por Rianxo será de 51 quilómetros. “A proba deste ano é especial porque está dedicada ao fundador e presidente do club, Ricardo Riveiro, polo seu gran traballo e implicación”, afirmou José Ramón Torrado, poñendo o foco na satisfacción de seguir celebrando “unha proba coma esta 34 anos despois, e agardo que perdure por moito tempo”. Salientou tamén o carácter referencial da cita no panorama actual do ciclismo galego, “posto que practicamente todos os clubs de Galicia participaron nela algunha vez”.
Dende a Federación destacaron a grande aposta que o Club Ciclista Barbanza realiza pola promoción do deporte, “algo que se demostra nunha proba como esta que ademais é puntuábel para a Copa de Galicia cadete en ciclismo de estrada”, afirmou Carlos Muñiz.
A concelleira de Deportes, Dores Torrado, resaltou “o gran traballo que o Club realiza no fomento do deporte base e na súa aposta pola canteira, sendo unha das entidades con maior número de nenos e nenas inscritos”.
O alcalde, José Ramón Romero, agradeceu o traballo do Club Ciclista Barbanza e a colaboración da Federación Galega de Ciclismo “polo gran traballo que desenvolven a prol da promoción do deporte do ciclismo no noso municipio” e convidou á veciñanza a desfrutar deste evento deportivo “que é xa un referente no noso concello e no ciclismo galego”.
