A Sala do Civil e Penal do Tribunal Superior de Xustiza de Galicia (TSXG) confirmou a condena de catro anos e medio de cárcere imposta pola Audiencia Provincial da Coruña a un acusado de golpear ao seu veciño cunha barra de ferro en Noia. Os maxistrados rexeitaron o recurso do investigado e consideraron probado, do mesmo xeito que o tribunal de primeira instancia, que en novembro de 2018 golpeou varias veces coa barra de ferro á vítima, que acudira ao seu domicilio para recriminarlle uns comentarios que fixera a uns veciños sobre ela. A relación entre ambos, segundo o fallo xudicial, non era boa. Ambos mantiveron unha discusión, ao final da cal se produciu a agresión. Ademais da pena de prisión, o tribunal impúxolle o pagamento dunha indemnización de 24.932 euros á vítima polas lesións e secuelas que sofre.
O TSXG salienta que comparte os criterios da sentenza apelada, á vez que destaca que a versión alternativa aos feitos que pretende dar o acusado “non se sostén nin ante a versión da vítima nin ante o informe do médico forense”. A Sala aceptou, do mesmo xeito que a Audiencia, que o recorrente golpeou “por sorpresa e por detrás” ao seu veciño, “servíndose dunha barra de ferro, cualificada para causar grave dano”, polo que confirma a existencia da agravante de aleivosía.
