Proseguen nos nosos concellos as actividades de apoio para previr o suicidio impulsadas dende a Asociación Andaina PSM (Pro Saúde Mental). Desta volta a entidade está a sumar esforzos para habilitar puntos de lectura permanentes sobre suicidio en colaboración coas Bibliotecas Municipais das comarcas de Ordes e Ulla-Sar. Dita iniciativa, na que se inclúe ao concello de Dodro, vén a ser unha das actuacións que contempla a liña de información e sensibilización do programa de prevención do suicidio que a entidade desenvolve nos municipios destas comarcas.
Programa específico
Andaina PSM conta cun programa específico de prevención de suicidio que se está a desenvolver na comarca de Ordes dende 2020 e na comarca de Ulla-Sar dende 2021. Este programa pretende “abrir o debate en torno a un problema que vén incidindo de xeito notábel na nosa comunidade, así como ofrecer acompañamento e ferramentas a profesionais e persoas vulnerábeis ou achegadas para a abordaxe desta problemática”.
O proxecto estrutúrase en tres liñas de acción: formación a profesionais do ámbito sociosanitario, intervención con persoas e grupos vulnerábeis e información e sensibilización social sobre a prevención da conduta suicida.
Como dixemos, en colaboración coas bibliotecas municipais das comarcas mencionadas organizáronse puntos de lectura sobre suicidio que están dotados dun mínimo de 5 títulos de obras que abordan a temática de xeito específico, así como de material de difusión do programa e de información e recomendacións.
Neste 2022 as bibliotecas colaboradoras son as Bibliotecas Municipais de Ordes, Oroso, Dodro e Padrón. Os puntos de lectura estarán en funcionamento dende o mes de xuño e manteranse ata comezos do mes de outubro. A entidade invita ao seguimento da súa actividade en redes sociais (Andaina Pro Saúde Mental en Facebook e @andaina_prosaudemental en Instagram) para poder coñecer as datas nas que se desenvolverán os obradoiros de lectura nas restantes bibliotecas colaboradoras.
Andaina Pro Saúde Mental, Andaina PSM, é unha asociación de persoas e familiares afectadas por trastorno mental grave que ten como finalidade prestar apoio e atención, contribuíndo á mellora da súa autonomía persoal e calidade de vida.
