A asociación inclusiva da nosa comarca Amicos clausurou este venres 15 de xullo o curso Auxiliar de Cociña, pertencente ao seu programa Máis Emprego, que desenvolve en colaboración coa Fundación La Caixa e o Fondo Social Europeo. Os oito alumnos formados recibiron un diploma en recoñecemento ao seu esforzo.
O curso, dirixido a persoas desempregadas con discapacidade ou en risco de exclusión social, tivo unha duración de 40 horas prácticas, abranguendo no seu inicio unha formación previa teórica para obter o carné de manipulador de alimentos.
Miguel Mosteiro, coñecido cociñeiro pola súa aparición en programas como Estache bo da TVG, foi o encargado de impartir o curso e destacou a implicación do alumnado en todos os tipos de pratos que elaboraban, “dende cousas máis básicas ata pratos máis elaborados como coello en escabeche”. Desexou que a aprendizaxe alí adquirida “lles valga ás persoas participantes para poder traballar en hostalería”.
Doutra banda, Miguel Beiro, responsábel da área de Empresas e Emprego de Amicos comentou que “para a Asociación Amicos é un verdadeiro pracer e unha honra estar aquí un ano máis, nesta terceira edición da acción formativa”. Engadiu: “A formación é unha parte máis do proceso para conseguir a inserción sociolaboral”.
Entre os asistentes estiveron tamén María Maneiro Quintáns, tenente Alcalde do Porto do Son e Manel Deán Pouso, concelleiro de Emprego do Porto do Son que dedicou unhas palabras de agradecemento á asociación e felicitou ao alumnado que realizou a formación. Rematou animando a que “calquera local de hostalería ou de restauración poidan contar con eles e elas nun futuro o máis próximo posíbel”. Ademais estivo presente Jose M. Pazó, orientador laboral do Concello de Porto do Son.
Trala entrega de diplomas levouse a cabo un show cooking onde os alumnos e alumnas formados elaboraron diferentes pratos para poñer en práctica todos os coñecementos adquiridos.
