O Pazo de Goiáns acollerá o vindeiro venres 22 de xullo un concerto da Real Filharmonía de Galicia, dirixida polo boirense Diego García Rodríguez. Será ás 21.00 horas e con capacidade para 400 persoas. A reserva de entradas estará dispoñíbel a partir do vindeiro luns 18. O repertorio da Real Filharmonía no recentemente restaurado pazo boirense, unha das xoias arquitectónicas da nosa comarca, estará formado pola Abertura de Don Giovanni, KV. 527, de Wolfgang Amadeus Mozar, e pola Sinfonía nº7 en La M, op. 92, de Ludwing Van Beethoven.
O concerto foi presentado este xoves 14 de xullo pola concelleira de Cultura, María Outeiral, e o promotor da actividade, Suso Santamaría.
“Estamos moi contentos de poder acoller este concerto porque a Real Filharmonía de Galicia non acostuma facer actuacións fora e vai tocar nun espazo incomparábel, o Pazo de Goiáns”, afirmou a concelleira. A orquestra estará dirixida por Diego García Rodríguez, director boirense.
“Van actuar sen ningunha amplificación de son e a acústica será a propia do espazo, polo que o aforo será reducido”, afirmou Suso Santamaría.
A capacidade que se estima é para 400 persoas, o espectáculo é gratuíto e a reserva de entradas poderase facer a partir do luns. En caso de choiva o espectáculo trasladarase ao interior do pazo, polo que se reducirá o número de entradas ás primeiras reservas efectuadas.
