O alcalde, José Ramón Romero, acompañou esta mañá ao presidente do Náutico de Boiro – Marina Cabo de Cruz, Manuel Fajardo, e ao presidente da Federación Galega de Vela, Manuel Villaverde, no acto de izado da Bandeira Azul do Náutico. Estiveron tamén os concelleiros María Outeiral e Carlos Muñiz, membros do CINA e do Club de Remo.
Con esta distinción o Náutico de Boiro convértese no único da Ría de Arousa con Bandeira Azul, un distintivo concedido pola Asociación de Educación Ambiental e do Consumidor que o Náutico renova por décimo ano consecutivo. Este distintivo acredita a calidade das instalacións e os servizos que ofrecen ás persoas usuarias.
O presidente do náutico, Manuel Fajardo, mostrou o seu orgullo porque “unha entidade pequena como a nosa sexa casi o club máis importante de España, esa é a nosa meta”. Durante a súa intervención deu a coñece o traballo que están a realizar por facer unhas instalacións acordes coa actividade do Náutico.
Nas súas declaracións o alcalde, José Ramón Romero, puxo en valor o traballo e esforzo da directiva do náutico que “están dando pasos para converterse no mellor náutico de España” e mostrou o compromiso do Concello de Boiro para facer realidade esas novas instalacións.
