O Club de Surf Area Longa celebra este sábado o seu 30 aniversario cunha gran festa deportiva e de lecer nas Furnas (O Son)

A praia das Furnas, en Porto do Son, vai dar acollida este sábado 25 de xuño á celebración do 30 aniversario do Club de Surf Area Longa, unha actividade conmemorativa impulsada dende o propio club e contando co Concello e a Federación Galega de Surf en tarefas de patrocinio. A axenda inclúe competicións, música reggae en directo e sorteos. Desenvolverase en horario de 11.00 a 23.00 horas. Haberá, ademais, bautizos gratis de surf, exhibicións creativas (por exemplo un mural en directo a cargo de Solo Samu), inchábeis para os máis pequenos, ioga terapéutico e un obradoiro de reciclaxe a cargo de Noia Limpa.

O Club de Surf Arealonga ten a súa orixe en 1992, impulsado pola comunidade local de surfeiros e visitantes asiduos das praias da contorna, que están entre as mellor consideras de Galicia e o ámbito estatal polos seareiros deste deporte. Amais de promover a práctica do surf e achegar formación para persoas iniciadas os seus integrantes téñense implicado en iniciativas de limpeza de praias e contornas costeiras e no desenvolvemento de eventos e competicións.