Este 5 de xuño clausúranse en Santa Irene as Escolas Deportivas de Porto do Son

Este 5 de xuño vaise celebrar o acto oficial de clausura das Escolas Deportivas locais de Porto do Son. Será a partir das 18.00 horas no Polideportivo de Santa Irene. O programa inclúe exhibicións de baile, taekwondo, patinaxe e acrobacias.

As Escolas Deportivas para o presente curso, 2021-2022, contaron con sete sedes de actividade e un amplo programa de disciplinas.

Unha das grandes novidades deste curso foi a colaboración do club Artrogal, que se materializou nunha escola de tríatlon para a rapazada: a escola Trisón. O obxectivo desta proposta foi mellorar a condición física das nenas e nenos ao tempo que se lles achegaban recursos para socializar e traballar en grupo e, tamén, superar desafíos emocionais e anímicos.

As escolas impartíronse no Polideportivo de Santa Irene (predeporte, baile moderno, mantemento para maiores, pilates, acrobacias, baile acrobático, spinning e fit training) e nas Casas da Cultura de Portosín (spinning e pilates), Queiruga (pilates), Baroña (mantemento de maiores), Xuño (mantemento de maiores), Caamaño (mantemento de maiores) e San Pedro (mantemento de maiores).