Máis de 20 persoas asistiron na ABE a unha nova xornada sobre as oportunidades empresariais no rural

A ABE acolleu esta semana unha nova edición das súas Xornadas Inspiradoras, baixo o lema Hai futuro! Novas oportunidades para a empresa rural. Participaron unhas vinte persoas traballadoras autónomas. Veu da man de APE Galicia en colaboración coa Xunta, a Asociación Boirense de Empresarios e o IGAPE. O obxectivo foi potenciar os negocios o rural e achegar claves sobre como poñelos en marcha e facelos medrar, amais de amosar nichos de actividade e oportunidades de financiamento. No evento participaron o presidente da ABE, Daniel García, o presidente de APE Galicia, José Ramón Caldas, e o a subdirectora da Oficina Galicia Emprende, IGAPE, Fany Suárez.

Eduardo García Erquiaga, director de Galicia Business School, foi o encargado de impartir o relatorio no que analizou a situación das persoas traballadoras autónomas das zonas rurais e afondou nas técnicas para mellorar o seu desenvolvemento profesional e avanzar nos seus proxectos. O director de Galicia Business School explicou cales son as fortalezas do rural, as novas oportunidades que existen e as técnicas para efectuar unha dixitalización efectiva. Pola súa banda, a subdirectora da Oficina Galicia Emprende, IGAPE, Fany Suárez, tamén informou acerca das liñas de actuación e de apoio que ten en marcha a Xunta de Galicia.

En xeral, o obxectivo destas xornadas formativas é “inspirar ás persoas autónomas das zonas rurais, animar a emprender, consolidar e repensar o negocio en áreas non urbanas, destacar as fortalezas que ten a empresa nesta zona, e detectar novas oportunidades que chegan da man dos cambios tecnolóxicos e dos cambios nos valores dos clientes”. Ademais, esta iniciativa ofrece información sobre o emprendemento, a mellora no desenvolvemento profesional, a consolidación dos proxectos e a reinvención dos negocios.