O grupo conserveiro JEALSA, con sede principal en Boiro, vén de selar unha alianza coa Universidade de Vigo para dar forma a uns galardóns conxuntos que buscan visualizar, reivindicar e distinguir contribucións á sustentabilidade e á economía circular. Trátase dos Premios We Sea, que veñen na súa primeira edición con dúas modalidades: unha que recoñecerá o mellor traballo de Fin de Grao (TGF), e outra que premiará o mellor traballo de Fin de Mestrado-Máster (TFM).
Os Premios We Sea levan o nome do propio programa de Responsabilidade Social Corporativa de JEALSA, que é, segundo lembra a conserveira, un programa pioneiro no ámbito estatal conserveiro e cuxos obxectivos “son o benestar económico social e a protección da contorna natural”, reunindo todo o traballo e investimentos realizados pola compañía en materia de sustentabilidade e coidado do medio ambiente.
We Sea está articulado nos cinco eixos de actuación de JEALSA, que reflicten á perfección o compromiso activo que mantén toda a compañía: pesca e compra responsábel (We Buy & Sea), políticas de calidade (We Control & Sea), enerxías renovábeis e medio ambiente (We Care & Sea), responsabilidade Social (We Respect & Sea) e economía circular (We Invest & Sea).
“Estamos moi contentos de colaborar coa Universidade de Vigo para a creación dos Premios We Sea, que teñen o obxectivo de recoñecer as mellores prácticas de sustentabilidade e economía circular, así como de incentivar a formación e investigación en materia de innovación e modernización do sistema produtivo e desenvolvemento sustentábel. É importante concienciar á sociedade e ao talento que está por vir”, comenta Ángeles Claro, directora do programa We Sea de JEALSA.
Entre os requisitos para os galardóns os traballos deberán obter unha cualificación igual ou superior a 8, e estar orientados á consecución dalgunha das metas do Obxectivo de Desenvolvemento Sustentábel, entre as que se atopan a produción e o consumo responsábel (punto 12) ou o coidado da vida submarina (punto 14).
Os estudantes da Universidade de Vigo que sexan recoñecidos cos Premios We Sea recibirán 1.000 euros en metálico, así como un convenio de prácticas remuneradas por un período de tres meses nun centro de traballo de JEALSA, que se fará cargo de todos os gastos derivados do galardón. O prazo de presentación de candidaturas finalizará o próximo 16 de setembro de 2022.
Para máis información podemos consultar as bases online da convocatoria.
