O concello atendeu máis de cen solicitudes de prazas para as distintas quendas
O Concello de Outes publicou o pasado 10 de Xuño a listaxe de admitidos nas distintas quendas do campamento de verán 2022, dentro do programa “Outes Concilia”. En total, foron 116 as solitudes atendidas para obter unha praza nalgunha das 6 quendas ofrecidas. O campamento de verán cubre todo o período non lectivo, xa que comeza o día 23 de Xuño e remata o 7 de setembro. As quendas máis solicitadas foron as dos meses de Xullo e Agosto, nas que a demanda mesmo superou a oferta de prazas, que se fixou en 60 rapaces por quenda.
O alcalde de Outes, Manolo González, salientou o éxito do programa Outes Concilia, que cada día conta con maior aceptación entre as familias outenses e mesmo doutros concellos da comarca. O Campamento de Verán terá a súa sede nas instalacións do CEIP de Outes e combina actividades de lecer, sobre todo o aire libre, con actividades didácticas para as nenas e nenos de 3 a 16 anos. No programa inclúense saídas a distintas zonas do concello como a praia de Broña, andainas e mesmo saídas en barco dende o porto do Freixo. “Ofrecemos un servizo de concilicación durante todo o período non lectivo, o que sirve para que as familias máis novas teñan máis facilidades para vivir non noso concello”, afirmou o alcalde. O regulamento de acceso ao campamento prioriza o empadroamento no concello polo que ningún rapaz ou rapaza de Outes quedou sen praza, se ben nas quendas máis demandadas algunhas familias con residencia noutros concellos non puideron obter praza.
