O Concello de Ribeira vén de dar o impulso definitivo á creación dunha senda peonil en Coroso, coa aprobación inicial do expediente de expropiación para dar corpo definitivo a esta nova vía de lecer. Esta intervención encádrase na estratexia de desenvolvemento urbano Máis Ribeira Atlántica, que está co-financiada nun 80% polo Fondo Europeo de Desenvolvemento Rexional (FEDER) dentro do Programa Operativo Plurirrexional de España (POPE) 2014-2020. O obxectivo é poñer en valor e recuperar a contorna do río Grande, que desemboca na praia de Coroso. De feito, a día de hoxe é imposíbel circular pola súa zona de servidume.
Co obxecto de devolver o esplendor natural e paisaxístico a este espazo para uso público o Concello quere crear unha senda peonil que permita acceder a pé até a praia de Coroso desde a estrada AC-305. A redacción do proxecto fixa unha senda de 297 metros de longo dende o arroio Saíñas até o Paseo Marítimo de Coroso. “Deste xeito”, informa o Concello, “conéctase a AC-305 ou avenida da Coruña coa praia de Coroso e faise dunha maneira sustentábel, integrada e innovadora, enlazando unha zona de gran actividade comercial (especialmente polos supermercados alí situados) con outra zona escolar na que se atopan o CIFP Coroso e a Escola Oficial Náutico Pesqueira”.
Na maior parte do trazado utilizarase pavimento natural flanqueado por bordos de madeira, a excepción dun tramo de pasarela de madeira con pilotes de 19 metros de longo. O obxectivo neste punto é “transformar a fronte fluvial nunha zona con maior calidade ambiental, paisaxística e de seguridade, xerando un espazo mixto, con predominio para o peón pero no que tamén poderían circular bicicletas (non así vehículos a motor), potenciando así a mobilidade alternativa e dándolle plusvalía aos espazos verdes, para o uso cotiá e o lecer”.
A actuación comporta un investimento de 179.612 € co-financiado con fondos europeos FEDER. O prazo de execución son catro meses.
En canto á devandita expropiación, abrangue unha superficie total de 64 metros cadrados localizados en dúas fincas na zona de servidume do curso fluvial. Co anuncio publicado no BOP deste 8 de xuño ábrese un período de exposición pública de quince días hábiles para a presentación de alegacións entre os posíbeis interesados.
