En Boiro adxudicadas as obras para traballos de pavimentado en Currilo, A Mina, Carragueiros e Loimar

O Concello de Boiro aprobou a adxudicación da obra de mellora de pavimentación en Carragueiros, Currillo, A Mina e Loimar do POS+2021 da Deputación da Coruña por importe de 148.781,01 euros.

O proxecto contempla a mellora e conservación do conxunto do firme e as súas características funcionais, así como dotar de servizos de recollida de pluviais no tramo que se vai a executar na zona do Currillo. Segundo detallou o Concello, os lugares obxecto da actuación son treitos do entorno rural en Carrageiros, Currillo, A Mina e Loimar e as obras teñen como obxecto mellorar o firme e a dotación de servizos básicos.

En Carragueiros vaise actuar nun tramo de vía de 970 metros para a rehabilitación superficial dun total de 8.439 metros cadrados de superficie. Na Mina vaise actuar en dous tramos distintos, un deles e 500 metros entre a Mina e a Madalena, e outra actuación de A Mina a Rosadelas con pavimentado dun tramo de 200 metros e outro de 170. En Loimar vaise levar a cabo unha actuación de 400 metros de lonxitude, nos que se vai levar a cabo a rehabilitación superficial para conservar e mellorar as características funcionais e protección do conxunto do firme.

En Currillo, ademais de renovación dun tramo de 192 metros do firme, vaise executar unha rede separativa de pluviais que garanta que as augas da choiva non deterioren a vía, aumentando a súa durabilidade e que non acaben filtrando na rede de fecais existente e mellorar o funcionamento xeral da rede de fecais.