Convocan manifestacións en Carnota e Noia en defensa do futuro da planta de reciclaxe de Lousame

13 Xuño 2022

O comité de empresa da planta de recollida e reciclaxe de lixo da Mancomunidade Serra do Barbanza, xestionada por FCC, anunciou hoxe dúas manifestacións esta semana para denunciar a prácticas antisindicais da concesionaria e para esixir a implicación dos concellos para solucionar os problemas que ameazan o seu futuro. As mobilizacións serán o mércores, ás 12 horas, en Carnota, e o domingo, ás 12 horas, en Noia.

A planta de Lousame, posiblemente a mellor planta de reciclaxe do Estado español, arrastra desde hai anos unha serie de problemas que ameazan o seu futuro, en boa medida pola «nefasta» xestión por parte dos Concellos que integran a Mancomunidade. Isto levou o persoal a mobilizarse xa en diversas ocasións no último ano.

Falta de investimento nas instalacións, medios obsoletos e constantes problemas xudiciais entre a institución supramunicipal e a concesionaria son algunhas das eivas que foron lastrando as prestacións da planta. O último capítulo é a pretensión da Mancomunidade de prorrogar o contrato con FCC sen introducir melloras e, por riba, suprimindo a quenda de noite, o que provocará a perda de numerosos postos de traballo.

O comité solicitou en reiteradas ocasións a colaboración da Xunta de Galicia, pero a Administración autonómica deixou claro que a súa aposta é o modelo de Sogama, a incineración. Tamén se procurou apoio da Deputación da Coruña, cuxo presidente manifestou nunha reunión a comezos de ano a súa coincidencia coas reivindicacións dos representantes do persoal.

Unha das principais demandas é que se nomee un xerente ou xeranta da Mancomunidade, pois un dos problemas detectados é a falta de xestión, derivada en boa medida de que a presidencia do organismo é rotatoria —actualmente preside o alcalde de Carnota, Juan Manuel Saborido, do PSdeG.

Tamén houbo unha xuntanza co propio Saborido, para trasladarlle os acordos a que se chegara co presidente da Deputación. O rexedor carnotán manifestou verbalmente que se traballaría nesa liña, pero finalmente o comité acabou coñecendo extraoficialmente que a proposta será outra, a prórroga con recortes.

Esta situación súmase ao que CCOO cualifica de «prácticas antisindicais» da empresa e que afectan aos distintos sindicatos. No caso de Comisións, a sanción «inxustificada» de quince días de suspensión de emprego e soldo contra un delegado deste sindicato, así como a negativa a que outro compañeiro do sindicato forme parte do comité de seguridade e saúde laboral. «Estas prácticas están sendo analizadas polos nosos servizos xurídicos», sinalou Ricardo Santos, secretario de Comunicación de CCOO-Hábitat.

Por todo isto, o comité de empresa, integrado por CCOO, CIG e UGT, acordou retomar as mobilizacións esta semana, esixindo que os Concellos se impliquen na procura dunha solución.

Manifestacións

— Mércores, 15 de xuño, ás 12 h (Carnota). Saída da Churrascaría e remate diante do Concello.

— Domingo, 19 de xuño, ás 12 horas (Noia). Saída de Alexandre Cadarso e remate diante do Concello.

Outros artigos

I Concurso Infantil de Debuxo ApiBarbanza – 2024

A delegación de AGA, asociación Galega de Apicultores, no seu Delegacion do BARBANZA SALNES convoca I Concurso Infantil de Debuxo Apícola co fin de involucrar e concienciar aos nenos sobre o valor da abella como axente polinizador e na conservación do medio...

+

Todo preparado para a Semana Santa na ría da Estrela

Na ría da Estrela (ría de Muros e Noia) prepararon estes días até os máis miúdos detalles para recibir aos visitantes de Semana Santa. "Aqueles que buscan historia, contorna, gastronomía, atoparano neste roteiro que axunta os concellos de Lousame, Muros, Noia, Porto...

+

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...