Este luns 27 de xuño dan comezo na Alameda de Noia as Mañás Divertidas, lanzadas dende o Concello para facilitar o día a día das familias neste tempo de verán e de vacacións, achegando actividades deportivas e de conciliación. Celebraranse tres días á semana, os luns, os mércores e os venres, en horario de 10:30h a 13:30h e ata o 2 de setembro. Haberá, na Alameda, actividades con tenis, mini-golf, tenis de mesa, badminton ou tiro con arco, entre outras disciplinas deportivas. O programa foi dado a coñecer a semana pasada pola concelleira de Deportes, Laura Salgado, xunto a Rubén Seijo, xerente de Rubén Seijo Actividades Dirixidas. Segundo fixeron saber facilitarase aos participantes de xeito gratuíto todo o material necesario para poder desfrutar destas actividades de lecer, deporte e conciliación familiar.
