O Centro Cultural Lustres Rivas acolleu este xoves 2 de xuño a inauguración da mostra Polaridades, integrada por un total de 42 obras pertencentes a 14 artistas da Asociación Alterarte. O activo estivo presidido pola concelleira María Sampedro e contou tamén coa intervención de Áurea Pousa no nome do colectivo artístico.
Alterarte é unha asociación de artistas plásticos e visuais, cun proxecto dinámico e aberto a todo tipo de tendencias, que teñen como obxectivo a promoción das súas creacións artísticas e a divulgación doutras manifestacións culturais actuais.
A exposición que se pode contemplar no Lustres Rivas ata o 29 de xuño reúne “artistas de calidade acreditada” e “mostra a variedade de propostas que fan que o espectador sempre atope algo con que sentirse identificado”, segundo manifestou a edil.
Na iniciativa, incardinada na programación do Xuño da Cultura e as Artes, participan os seguintes creadores: Ana Padín, Áurea Pousa, Carmen Balbuena, Concetta Montenegro, Constantino González, David Cabaleiro, Diana Cordero, José Fervenza, Luisa Paz, Lurdes Meis, Manuel Cerdeira, María Fortes Blanco, Pilar G. Mourín e Tania Ulloa.
Pode ser visitada de luns a venres de 10 a 14 e de 19 a 21 horas e os sábados de 11 a 14 horas.
