O Concello de Boiro está a traballar no acondicionamento das praias e areais do municipio para que están a punto para a época estival. Os traballos comezaron polos areais de maiores dimensións e máis concorridos e continúan agora polas praias máis pequenas e as calas de distintos puntos do litoral.
Os operarios están a traballar no acondicionamento das praias de Areabasta, Ribademar ou Neixón na parroquia de Cespón, pequenos areais moi empregados pola veciñanza da zona. Ademais da limpeza e
acondicionamento da superficie areosa estanse habilitando mellores accesos e servizos. Na zona de Ribademar, ademais dos arranxos no paseo, estase a habilitar unha área recreativa nas proximidades do areal.
O Concello de Boiro aposta por incrementar os servizos nas praias, chegando dende as urbanas máis grandes e con maior afluencia ata as pequenas calas. Nun primeiro momento realizáronse os traballos de recollida de residuos depositados polo mar na superficie areosa para logo nivelar a area que moven as correntes do inverno. Nas vindeiras semanas comezaran a poñerse en funcionamento os servizos de praias tales como a limpeza manual diaria e os servizos de socorrismo.
