A Asociación de Empresarios de Ribeira vai retomar as actividades de lecer infantil previstas para a pasada edición da Noite Aberta e adiadas por mor das inclemencias meteorolóxicas dos días 3 e o 4 de xuño. Finalmente a patronal e o comercio local decidiron celebrar a devandita festa para a rapazada este sábado 2 de xullo, a partir das 16.00 horas. Contarase con inchábeis e outros xogos infantís.
Un dos elementos máis destacados será o tobogán acuático de máis de 100 metros que “estará localizado na rúa de Lugo”, informou a Asociación de Empresarios, engadindo que para acceder a este trebello será preciso presentar un tícket de compra dos establecementos participantes na Campaña da Noite Aberta, con datas 3 e 4 de xuño ou 2 de xullo, o mesmo día da actividade.
Ademais, para os máis cativos, habilitaranse inchábeis acuáticos na praza do Concello, que serán de balde, ao que se engade unha “gran festa da escuma”.
“Convidamos a todos veciños que teñan rapaces a desfrutar deste evento e, de paso, mercar nos comercios de Ribeira”, sinalou o presidente da patronal, Francisco Martínez Gude.
