A Dirección Xeral de Emerxencias e Interior da Vicepresidencia segunda da Xunta vén de activar unha alerta laranxa por temporal costeiro para hoxe no litoral das provincias da Coruña e de Lugo.
Segundo a Axencia Estatal de Meteoroloxía (AEMET), a partir deste mediodía dará comezo un fenómeno meteorolóxico adverso costeiro de nivel laranxa con ondas de 5 a 6 metros. Afectaralle ao noroeste do litoral da Coruña, ao norte de Vilán, e no caso do de Lugo, en torno a Bares.
Ademais, no oeste e suroeste do litoral coruñés producirase un fenómeno meteorolóxico adverso de nivel amarelo. Comezará ao mediodía de hoxe, por mar combinada de 4 a 5 metros e temporalmente ventos do noroeste de forza 7.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
A Xunta lembra a importancia de manterse afastado da liña de costa, isto é, diques, rompentes, paseos marítimos. Tamén se recomenda que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Ademais, aconséllase consultar a páxina web do CIAE 112 (www.112galicia.org), que conta con información meteorolóxica e con enlaces de interese.
