Abertas as inscricións para o Tríatlon Escolar de Porto do Son que se celebra este sábado 4 de xuño

Esta fin de semana o deporte xuvenil será o protagonista en Porto do Son. O motivo non será outro que a celebración da primeira entrega do Tríatlon de Menores que organizan o Concello, a Xunta e a FEGATRI e que dará cita a 350 participantes, cubrindo as categorías dende pre-benxamín até cadete.

O evento deportivo escolar desenvolverase o sábado 4 de xuño, con centro de operacións na dársena portuaria sonense (na fachada marítima acabada de remodelar e na céntrica praia do Cruceiro). As inscricións están abertas dende as 9.00 horas deste xoves 5 de maio.

As prazas dispoñíbeis son como dixemos 350. Cóbrense as categorías pre-benxamín, benxamín, alevín, infantil e cadete (cada categoría contará con percorridos de diferentes lonxitudes).

O Tríatlon Escolar de Porto do Son inclúe unha proba de selección para o campionato por comunidades autónomas da categoría infantil.

As inscricións para o Tríatlon están abertas na web RockTheSport e tamén o están para a proba Nada e Corre (non competitiva).

Os detalles do evento foron dados a coñecer polo concelleiro Juan Pouso, quen salientou que se trata dunha das actividades deportivas punteiras deste verán en Porto do Son, xunto co Campionato de Taekwondo.