A homenaxe da Compañía Eléctrica á miss galeguista chega a Rianxo o vindeiro 10 de xuño

Rianxo vai dar acollida ao novo espectáculo teatral da Compañía Teatral: unha función que rende homenaxe a Emilia Docet, tamén coñecida como “Miss España galeguista”. A cita cultural vén da man da Concellaría de Benestar Socia, Igualdade e Diversidade do Concello de Rianxo. Será o 10 de xuño no Auditorio Municipal, con funcións entre as 11.30 e as 21.00 horas.

A obra de teatro Miss Docet conta coa interpretación de Iria Pinheiro e nela a biografía de Emilia mestúrase e compleméntase coas de outras mulleres silenciadas e represaliadas logo do golpe militar e fascista do 36.

Miss Docet recupera desde a escena, en palabras da compañía teatral, “a potencia dunha xeración de galegas que viu truncada a súa historia e contribúe á loita para evitar que os seus nomes e os seus pasos desaparezan da nosa memoria”.

En concreto, a peza teatral achéganos á vida de Emilia Docet Ríos, que, con só 17 anos, aproveitou o concurso de Miss para exercer o seu galeguismo e a súa implicación política ademais de estar moi vencellada aos movementos do deporte e progresistas na cidade de Vigo.