A Feira de Automóbiles Híbridos, Eléctricos e de Ocasión de Ribeira exhibirá modelos de Tesla na rúa Mendiño

O programa da III Feira de Automóbiles Híbridos, Eléctricos e Vehículos de Ocasión, organizada esta fin de semana (dende este venres) pola Asociación de Empresarios de Ribeira en colaboración co Concello, vai vir cunha serie de importantes pratos fortes. Entre as actividades máis destacadas atópase unha exposición de vehículos eléctricos dunha das marcas máis sobranceiras do sector a nivel mundial: a marca Tesla. Os vehículos de Tesla poderán verse o sábado a partir das 18.00 horas, emprazados na rúa Mendiño de Ribeira, preto da praza de España (sede da feira).

Sobre Tesla

Tesla Motors é unha compañía norteamericana creada en 2003 con sede en California. Baixo o mando de Elon Musk, fabrica e comercializa vehículos, así como compoñentes e baterías para outros fabricantes como o grupo Daimler ou Toyota. Hoxe Tesla non só constrúe vehículos totalmente eléctricos de gran autonomía, senón que tamén fabrica produtos de almacenamento e xeración de enerxía limpa que poden ampliarse de maneira ilimitada.
Tesla superou as expectativas dos mercados e alcanzou unha resultados marca no primeiro trimestre de 2022, cuns beneficios netos de 3.318 millóns de dólares (ao redor de 3.039 millóns de euros), un 658% máis que hai un ano.

Sobre a feira

A terceira edición da Feira de Automóbiles Híbridos, Eléctricos e Vehículos de Ocasión celébrase esta fin de semana en Ribeira, na contorna da praza de España, entre este venres 17 e o 19 de xuño.

Organiza novamente a Asociación de Empresarios de Ribeira.

A feira contará coa presenza de trece marcas de vehículos que darán a coñecer as súas últimas novidades na gama híbrida e eléctrica, e algunha presentación en exclusiva. A previsión e xuntar na explanada da praza de España máis de 120 unidades para “que toda a veciñanza do Barbanza poida coñecer de primeira man os produtos innovadores que presentan as diferentes marcas”. Marcas como Peugeot, Kia, Hyundai, Citroen, Nissan, Dacia, Renault, Ford, Fiat, Jeep, BMW, Mercedes e Toyota.

A Asociación de Empresarios de Ribeira, consciente da escaseza de vehículos novos e co obxectivo de impulsar un mercado en auxe, inclúe nesta edición da feira un apartado de vehículos de ocasión, sendo o obxectivo “ofrecer ao cliente a posibilidade de levarse o vehículo no mesmo momento de realizar a compra”.

A patronal salientou na presentación os importantes descontos cos que contarán os vehículos expostos na feira.