Será a partir do vindeiro domingo 26 de xullo e ata o 31 do mesmo mes cando se celebre o festival de artes inclusivas e patrimonio costeiro de Ambar coñecido co nome de Mar Diverso. Nesta edición o festival contará coa presenza de Tere Ramallo, artista licenciada en Belas Artes, que está a traballar co grupo de arte formado por Manuela, Gonzalo, Juan, Calo, Ángel, Daniel, Alejandro, José Ma, Irene, Iria, Iván, Javier, Jesús e Manuel.
A peza que se está a crear fala, segundo as palabras da propia artista, “do entorno, e do coidado do mesmo, de coñecelo, e de pór o punto de mira no que nos rodea e darlle deste xeito a súa importancia, xa que moitas veces semella que o de fóra é mellor e deixamos de lado o espazo no que vivimos. Os pobos, e a vida que hai neles, un tema que xa trataron as xeracións anteriores, e no caso de Rianxo autores de alí (Castelao, Rafael Dieste, Manuel Antonio…) e da súa xeración (Rosalía), defenderon e escribiron sobre a importancia do pobo, a súa contorna e a lingua”.
Indo ao festival Mar Diverso en si, cómpre dicir que estamos perante unha mestura de artes plásticas, escénicas e artesanía que ten como obxectivo pór en valor o patrimonio e a cultura tradicional mariñeira de maneira inclusiva a través da creación artística de persoas con diversidade funcional e profesionais do eido artístico dentro da contorna costeira da Ría de Arousa.
En canto á Asociación Ambar, sinalar que está de aniversario: leva 40 anos traballando polos dereitos das persoas con diversidade funcional, promovendo a súa autonomía, independencia e igualdade de oportunidades. A área de Artes naceu co gallo de empoderar ás persoas con diversidade funcional a través da expresión artística, realizando accións na comunidade cunha temática de interese social.
