Xulgan este luns a un home por tentar levar a unha menor en Noia


A sección primeira da Audiencia Provincial da Coruña celebrará este luns día 30, o xuízo contra un home acusado dun intento de detención ilegal dunha menor en Noia

Segundo o escrito de cualificación fiscal, os feitos producíronse ao redor das 20,45 horas do 17 de xaneiro de 2021 cando o home viu, pola ponte de Campo de Noia, á menor, momento no que reduciu a velocidade do coche no que ía.

Cando comprobou que ía soa, “con ánimo de privar” a liberdade da menor, detivo o seu coche e saíu do mesmo para dirixirse a ela, aínda que a vítima, ao detectar a presenza do acusado, botou a correr.

Finalmente, o home logrou alcanzala, agarrándoa fortemente polo brazo e requiríndoa para que subise ao seu vehículo. Nese momento, apareceron dúas persoas que axudaron á moza para liberarse do acusado, que escapou do lugar.

O Ministerio Público cualifica os feitos como un delito tentado de detención ilegal dunha menor ou alternativamente un delito de coaccións, cunha pena de tres anos de cárcere.