O Concello de Boiro, a través da Concellería de Educación, confirmou que vai organizar un ano máis o Campamento Concilia de Verán, que ten como finalidade facilitar a vida das familias en tempo de vacacións e garantir o lecer para a rapazada e o desenvolvemento da actividade laboral para as nais e os pais. O prazo de presentación de solicitudes abrirá o vindeiro día 1 de xuño. As bases e información poden consultarse na web municipal.
O Concello explicou que nesta edición postCOVID do campamento ampliaranse as prazas dispoñíbeis a 205. Estarán repartidas do seguinte xeito: 150 no CEIP Santa Baia, 30 no CEIP de Abanqueiro, e 25 no Centro Social de Cabo de Cruz. O horario do campamento será de 8.00 a 14.00 horas ou de 10.00 a 14.00 horas e celebrarase entre os día 4 de xullo e 30 de agosto de 2022.
O prezo do campamento de verán será de 100 euros por mes para o horario de 8.00 a 14.00 horas e de 90 euros por mes para o horario de 10.00 a 14.00 horas.
Amais, haberá desconto do 50% para dous ou máis irmáns e de 80% para persoas en exclusión social.
O Concello engade que “para participar no campamento primarase a orde de entrada no rexistro, aquelas persoas que asistan os dous meses, o empadroamento en Boiro e a ocupación laboral dos proxenitores ou titores legais, xustificábel con copia do contrato laboral ou certificado de empresa onde se especifique a xornada laboral”.
O prazo de inscrición abrirá o vindeiro mércores día 1 de xuño e as inscricións deben facerse a través do Rexistro Xeral ou da sede electrónica do Concello de Boiro durante un prazo de 10 días naturais.
